Ekki tekin afstaða til hljóðritunar á símtali
Mál nr. 2021040797
Persónuvernd barst kvörtun þess efnis að símtal kvartanda við tvo einstaklinga hafi verið hljóðritað án hans vitneskju. Vísað var til ódagsetts bréfs sem birt var á vefsíðu tiltekins félags þar sem gefið var í skyn að upptaka væri til af umræddu símtali. Einstaklingarnir neituðu því báðir að símtalið hefði verið tekið upp.
Þar sem orð stóð gegn orði um það hvort vinnsla persónuupplýsinga hafi farið fram taldi Persónuvernd sig skorta forsendur til að taka afstöðu til þess hvort unnið hafi verið með umræddar persónuupplýsingar kvartanda á þann hátt sem greinir í kvörtuninni.
Úrskurður
Hinn 29. september 2021 kvað Persónuvernd upp svohljóðandi úrskurð í máli nr. 2021040797.
I.
Málsmeðferð
1.
Tildrög máls
Hinn 5. apríl 2021 barst Persónuvernd kvörtun frá [A] (hér eftir kvartandi) yfir vinnslu persónuupplýsinga um hann í tengslum við hljóðritun símtals milli hans og [B] og [C].Með bréfum, dags. 19. ágúst 2021, var [B] og [C] boðið að koma á framfæri skýringum vegna kvörtunarinnar. Svar [B] barst Persónuvernd með tölvupósti þann 5. september s.á. og svar [C] barst Persónuvernd með tölvupósti þann 8. s.m.
2.
Sjónarmið kvartanda
Kvörtunin lýtur að því að símtal kvartanda, við [B] og [C], sem voru [starfsmenn X], hafi verið hljóðritað án vitneskju kvartanda. Kvörtuninni til stuðnings er vísað til ódagsetts bréfs sem birt var á vefsíðu [X], en í því er meðal annars vísað til meintrar hótunar sem kvartandi á að hafa sett fram í símtali við [B] og [C] , og tiltekið að til sé upptaka af þessari hótun. Kvartandi segist ekki hafa verið upplýstur um að símtalið væri tekið upp.3.
Sjónarmið [B] og [C]
Í svörum [B] og [C] segir að símtalið hafi ekki verið hljóðritað og er því hafnað að sú vinnsla persónuupplýsinga sem lýst er í kvörtun hafi átt sér stað. Engin upptaka sé til af símtalinu.II.
Forsendur og niðurstaða
1.
Niðurstaða
Gildissvið laga nr. 90/2018, um persónuvernd og vinnslu persónuupplýsinga, og reglugerðar (ESB) 2016/679, sbr. 1. mgr. 4. gr. laganna, og þar með valdsvið Persónuverndar, sbr. 1. mgr. 39. gr. laganna, nær til vinnslu persónuupplýsinga sem er sjálfvirk að hluta eða í heild og vinnslu með öðrum aðferðum en sjálfvirkum á persónuupplýsingum sem eru eða eiga að verða hluti af skrá.Kvartandi telur að símtal hans við [B] og [C] hafi verið tekið upp án þess að honum hafi verið tilkynnt um það en því hafa þeir [B] og [C] hafnað. Samkvæmt því stendur orð gegn orði um það hvort sú vinnsla persónuupplýsinga sem kvartað er yfir hafi farið fram. Með vísan til þessa hefur Persónuvernd ekki forsendur til að taka afstöðu til þess hvort [B] og [C] hafi unnið með umræddar persónuupplýsingar kvartanda á þann hátt sem greinir í kvörtuninni. Þá telur Persónuvernd, eins og hér háttar til, ekki tilefni til þess að stofnunin beiti þeim valdheimildum, sem henni eru fengnar í lögum nr. 90/2018, til þess að rannsaka það nánar.
Samkvæmt framangreindu er því ekki unnt að fullyrða að átt hafi sér stað vinnsla persónuupplýsinga kvartanda sem fór í bága við ákvæði laga nr. 90/2018, um persónuvernd og vinnslu persónuupplýsinga.
Ú r s k u r ð a r o r ð:
Ekki liggur fyrir að átt hafi sér stað vinnsla persónuupplýsinga um [A] af hálfu [B] og [C] sem fór í bága við ákvæði laga nr. 90/2018, um persónuvernd og vinnslu persónuupplýsinga, eða reglugerð (ESB) 2016/679.Persónuvernd, 29. september 2021,
Helga Þórisdóttir Helga Sigríður Þórhallsdóttir