Samræmdar úttektir innan EES á notkun opinberra aðila á skýjaþjónustu
Evrópska persónuverndarráðið (EDPB) hefur ákveðið að „notkun opinberra aðila á skýjaþjónustu“ sé það viðfangsefni sem sé í forgangi í sameiginlegum aðgerðum aðildarríkja ráðsins árið 2022. Á þeim grundvelli ætla 22 persónuverndarstofnanir á EES-svæðinu að hefja sameiginlegar úttektir eða athuganir á notkun opinberra aðila á skýjaþjónustu og munu yfir 80 aðilar víðs vegar á svæðinu sæta þessum aðgerðum.
Þetta eru fyrstu samræmdu eftirfylgniaðgerðir (e. coordinated enforcement action) Evrópska persónuverndarráðsins. Aðgerðirnar eru eitt af lykilverkefnum ráðsins árin 2021-2023 og miða að því að auka samræmi og samvinnu persónuverndarstofnana í Evrópu.
Persónuvernd er ein þeirra persónuverndarstofnana sem tekur þátt í framangreindum aðgerðum og mun, nú í lok febrúar, hefja úttektir á notkun sveitarfélaga á skýjaþjónustu í grunnskólastarfi.
Sveitarfélögin sem Persónuvernd kemur til með að taka út eru:
Reykjavík
Kópavogur
Hafnarfjörður
Reykjanesbær
Akureyri
Garðabær
Nánar má lesa um samstarfsverkefnið hér.