Ekki réttar forsendur við breytingu á varðveislutíma upplýsinga um lyfjaneyslu
Persónuvernd hefur sent heilbrigðisráðherra og formanni heilbrigðisnefndar Alþingis bréf með ábendingu um að ekki hafi verið byggt á réttum forsendum þegar lögum um varðveislutíma upplýsinga um lyfjaneyslu var breytt í vor.
Persónuvernd hefur sent heilbrigðisráðherra og formanni heilbrigðisnefndar Alþingis bréf með ábendingu um að ekki hafi verið byggt á réttum forsendum þegar lögum um varðveislutíma upplýsinga um lyfjaneyslu var breytt í vor.
Að mati Persónuverndar hefur lyfjagagnagrunnur landlæknis að geyma afar viðkvæmar persónuupplýsingar, sem aðeins skuli nýta í samræmi við lög og ekki geyma lengur en nauðsyn ber til. Með framangreindum lögum var varðveislutími persónuupplýsinga í þessum gagnagrunni hins vegar lengdur úr þremur árum í 30. Í nefndaráliti meirihluta heilbrigðisnefndar Alþingis var breytingin m.a. rökstudd með vísun til umsagnar landlæknisembættisins þar sem sagði að gögn í svipuðum gagnagrunnum á Norðurlöndunum væru varðveitt í 30 ár.
Athugun hefur leitt í ljós að samkvæmt lögum um lyfjagagnagrunna í Danmörku, Noregi, Svíþjóð og Finnlandi skal persónugreinanlegum gögnum annað hvort eytt mun fyrr eða gæta þess að hafa upplýsingarnar ekki með persónuauðkennum. Persónuvernd vakti athygli á þessu á fundi heilbrigðisnefndar áður en lyfjalögum var breytt. Það gerði hún og með bréfi til formanns heilbrigðisnefndar Alþingis og heilbrigðisráðherra, dags. 22. júlí 2008.
Norræn löggjöf sem vísað er til í bréfi Persónuverndar:
Nefndarálit meirihluta heilbrigðisnefndar Alþingis frá 27. maí 2008
Bréf Persónuverndar til heilbrigðisnefndar Alþingis frá 19. mars 2008
Bréf Persónuverndar til heilbrigðisráðherra frá 31. janúar 2008