Fréttir
Lok máls í framhaldi af úttekt hjá Sjúkratryggingum Íslands
Mál nr. 2020010085
Hinn 2. maí 2023 tók Persónuvernd ákvörðun varðandi eftirfylgni og beitingu viðurlaga í framhaldi af úttekt á öryggi persónuupplýsinga hjá Sjúkratryggingum Íslands. Var talið að með fullnægjandi hætti hefði verið brugðist við fyrirmælum sem gefin voru í tengslum við úttektina. Jafnframt var talið að tvenns konar öryggisveikleikar, sem til staðar voru við gerð vettvangsathugunar í október 2021, gæfu tilefni til álagningar sektar. Í ljósi allra atvika, þ. á m. mikillar vinnu Sjúkratrygginga við að bæta öryggiskerfi sitt og mikils samstarfsvilja stofnunarinnar, en einnig m.a. umfangs vinnslu og þess að um ræddi viðkvæmar persónuupplýsingar, ákvaðst fjárhæð sektarinnar tvær milljónir króna.