Heimsókn til systurstofnunar Persónuverndar á Ítalíu
Dagana 26.-27. október sótti starfsfólk Persónuverndar tveggja daga fræðslufund hjá ítölsku persónuverndarstofnuninni í Róm. Á dagskránni var meðal annars umfjöllun um nýleg mál tengd ChatGPT, Replika, TikTok og SeeSaw auk þess sem persónuvernd barna var í forgrunni.
Forstjóri ítölsku stofnunarinnar, Pasquale Stanzione, tók á móti Helgu Þórisdóttur, forstjóra Persónuverndar, og öðrum fundargestum og opnaði dagskrána með ávarpi. Þá flutti Helga ávarp og kynnti starfsemi Persónuverndar. Í kjölfarið voru fluttar kynningar á málum tengdum gervigreind og persónuvernd barna á Netinu, þ. á m. málum varðandi Chat GPT, Replika, TikTok og SeeSaw, og nánar rætt um fræðslu og eftirlit stofnananna á því sviði. Þá var meðal annars sagt frá Netumferðarskólanum, fræðsluátaki Persónuverndar og Fjölmiðlanefndar sem nú stendur yfir, sem miðar að því að efla fræðslu um persónuvernd, miðlalæsi og netöryggi barna í stafrænni tilveru.
Fræðslufundurinn var liður í því að styrkja samvinnu evrópskra persónuverndarstofnana og koma á fót nánari samvinnu milli stofnananna tveggja hvað varðar persónuvernd barna og viðkvæmra hópa, sem njóta sérstakrar verndar í persónuverndarlöggjöfinni.
Frétt á vefsíðu ítölsku persónuverndarstofnunarinnar
