EDPB og EDPS kalla eftir banni við notkun gervigreindar við ákveðnar aðstæður
Evrópska persónuverndarráðið (EDPB) og Evrópska persónuverndarstofnunin (EDPS) samþykktu á síðasta fundi sínum sameiginlegt álit um tillögur framkvæmdastjórnar ESB að nýrri reglugerð sem hefur það markmið að samræma reglur um gervigreind.
Í álitinu er því fagnað að taka eigi til skoðunar notkun gervigreindarforrita á Evrópska efnahagssvæðinu. Á sama tíma lýsa báðir aðilar yfir áhyggjum að alþjóðleg samvinna á sviði löggæslu fellur ekki innan gildissviðs tillögunnar. Þá er lögð áhersla á að taka þurfi sérstaklega fram að öll vinnsla persónuupplýsinga með notkun gervigreindar falli undir persónuverndarlöggjöf Evrópusambandsins.
Með vísan til þeirrar miklu áhættu sem felst í notkun lífkennaupplýsinga úr fjarlægð (e. remote biometric authentication) á svæðum sem aðgengileg eru almenningi kalla bæði EDPB og EDPS eftir almennu banni á notkun slíkrar tækni við þessar aðstæður.
Í álitinu er sérstaklega kallað eftir banni á notkun andlits- og fingrafaragreiningartækni, tækni sem getur greint göngulag og rödd einstaklings eða áslátt á lyklaborð og aðra tækni sem getur greint einstaklingsbundna þætti úr fjarlægð/í almannarými. Þá er kallað eftir banni á notkun gervigreindar sem noti lífkenni til að flokka einstaklinga í hópa, eftir uppruna, kyni, kynhegðun eða stjórnmálaskoðunum. Jafnframt er kallað eftir banni á notkun gervigreindar til að draga ályktanir um tilfinningar nema við mjög sérstakar aðstæður og banni við notkun gervigreindar við félagslega einkunnagjöf (e. social scoring).
Sameiginlegt álit EDPB og EDPS