Allar spurningar og svör

Tölvupóstur

Gæta þarf að persónuverndarreglum þegar skoða þarf vinnupóst starfsmanna. Almennt er óheimilt að skoða einkatölvupóst starfsmanna nema brýna nauðsyn beri til.

Má vinnuveitandinn minn skoða tölvupóstinn minn?

Vinnuveitanda er óheimilt er að skoða einkatölvupóstinn þinn nema brýna nauðsyn beri til, s.s. vegna tölvuveiru eða sambærilegs tæknilegs atviks. Einkatölvupóstur er almennt tölvupóstur sem þú sendir eða móttekur á vinnustaðnum þínum og lýtur einungis að einkamálefnum þínum en varðar hvorki hagsmuni vinnuveitanda né þá starfsemi sem hann rekur.

Vinnuveitandi má setja upp eftirlitskerfi með tölvupósti með hliðsjón af netöryggissjónarmiðum, t.d. vírusvarnir sem koma í veg fyrir að óæskilegur tölvupóstur berist inn á starfsstöð. Tilvikabundin skoðun vinnuveitanda á tölvupósti þínum sem starfsmanns er hins vegar óheimil nema heimild sé til hennar samkvæmt persónuverndarlögum, s.s. ef grunur er uppi um að þú hafir brotið gegn trúnaðar- eða vinnuskyldum. Við skoðun á tölvupósti þarf vinnuveitandi ávallt að gæta að meginreglunum, m.a. um sanngirni, gagnsæi og meðalhóf. Í því felst m.a. að hann hafi veitt þér og öðrum starfsmönnum fræðslu um hvaða vöktun fer fram og í hvaða tilgangi.

Þegar tölvupóstsnotkun er skoðuð verður vinnuveitandi gæta þess að gera þér fyrst grein fyrir því og veita þér færi á að vera viðstaddur þegar tölvupósturinn er skoðaður. Þetta á þó ekki við ef þess er enginn kostur, s.s. vegna alvarlegra veikinda þinna. Getur þú ekki sjálf/ur verið viðstaddur skoðunina skal veita þér færi á að tilnefna annan mann í þinn stað.

Persónuvernd hefur sett reglur um rafræna vöktun og meðferð persónuupplýsinga sem verða til við rafræna vöktun, nr. 837/2006, en þar er m.a. sérákvæði um tölvupóst og netnotkun.

Hvaða reglur gilda um meðferð tölvupósts við starfslok?

Við starfslok á að gefa þér kost á að eyða eða taka afrit af þeim tölvupósti sem ekki tengist starfsemi vinnuveitandans. Einnig á að leiðbeina þér um hvernig þú virkjar sjálfvirka svörun úr pósthólfinu þínu um . Vinnuveitanda er bannað að áframsenda á annan starfsmann þann póst sem berst í pósthólfið þitt eftir starfslok, nema um annað hafi verið samið.

Vinnuveitandi á síðan að loka pósthólfinu þínu ekki seinna en tveimur vikum eftir starfslok. 



Var efnið hjálplegt? Nei