Persónuvernd hefur veitt umsögn um drög framkvæmdastjórnar ESB að persónuverndarreglugerð sem kæmi í stað gildandi tilskipunar á því réttarsviði nr. 95/46/EB, en lög nr. 77/2000 hafa byggst á þeim grundvelli sem þar er lagður. Í reglugerðardrögunum er að finna ýmis nýmæli, m.a. um það sem nefnt er rétturinn til að gleymast. Þá gera drögin ráð fyrir mjög víðtæku landfræðilegu gildissviði, þ.e. að þeir sem bjóða fram vöru eða þjónustu á yfirráðasvæði aðildarríkjanna falli undir reglugerð samkvæmd drögunum þó svo að þeir hafi staðfestu utan aðildarríkja, en þetta myndi einkum skipta máli í viðskiptum sem fram fara á Netinu. Miklar breytingar yrðu á fyrirkomulagi stjórnsýslu, en persónuverndarstofnanir aðildarríkja yrðu að hafa mjög nána samvinnu sín á milli, auk þess sem vald ESB yrði verulega aukið.