Birting upplýsinga um greiðslur TR til einstakra tannlækna, sem og um verð hjá einstökum tannlæknum, á heimasíðu stofnunarinnar

„Það tilkynnist hér með að Tryggingastofnun ríkisins hyggst birta reglulega á heimasíðu stofnunarinnar upplýsingar um ýmsar greiðslur stofnunarinnar til tannlækna.

Eins og kunnugt er eiga sjúkratryggðir einstaklingar rétt á greiðsluþátttöku Tryggingastofnunar í kostnaði við tannmeðferð þegar um er að ræða börn og elli- og örorkulífeyrisþega og þegar um alvarlega sjúkdóma og slys er að ræða sbr. 38. og 42. gr. almannatryggingalaga nr. 100/2007 sem nánar er útfært í reglugerð nr. 576/2005. Þar sem tannlæknar eru ekki með samning við Tryggingastofnun greiðir stofnunin skv. gjaldskrá nr. 898/2002 sem sett er af ráðherra. Gjaldskrá tannlækna er hins vegar frjáls.

Þar sem verðlagning tannlækna er frjáls er mjög mismunandi hvað sjúklingar þurfa að greiða fyrir þjónustu þeirra. Til þess að stuðla að upplýsingum til sjúklinag voru árið 2004 settar reglur um verðupplýsingar um þjónustu tannlækna þar sem kveðið var á um að tannlæknar skyldu láta gjaldskrá sína liggja frammi á tannlæknastofum sínum og gera skriflega kostnaðaráætlun við fyrirhugaða meðferð muni hún fara yfir 100.000 kr. Því miður hafa tannlæknar ekki fylgt þessum reglum nema í litlum mæli.

Það er augljóslega mikið hagsmunamál fyrir almenning að fá að vita hvaða greiðslu tannlæknar krefjast fyrir þjónustu sína. Reynsla Tryggingastofnunar er sú að verðbil milli tannlækna getur hlaupið á tugum eða hundruðum þúsunda króna fyrir sambærilega þjónustu. Við núverandi fyrirkomulag eru sjúklingar algerlega óvarðir gagnvart slíku.

Tryggingastofnun greiðir tugi þúsunda tannlæknareikninga á ári hverju og er nú með gott tölvukerfi sem heldur utan um greiðslurnar. Það er því auðvelt fyrir stofnunina að fá ýmsar upplýsingar út úr kerfinu sem nýst gætu sjúklingum er þurfa tannmeðferðar við. Tryggingastofnun hefur því ákveðið að birta á heimasíðu stofnunarinnar ýmsar verðupplýsingar almenningi til hagsbóta.

Tryggingastofnun er fullljóst að ýmsar skýringar kunna að liggja að baki mismunandi gjaldtöku tannlækna fyrir að því er virðist sama verkið. Því mun stofnunin leitast við að birta aðeins marktækar samantektir og ávallt með þeim fyrirvara að um sambærileg verk sé að ræða og að fjárhæðir séu eingöngu unnar upp úr þeim gögnum sem stofnunin hefur undir höndum.

Hjálagðar eru samantektir um meðalkostnað Tryggingastofnunar vegna þjónustu einstakra tannlækna fyrir hvert barn sem þeir sinna sem Tryggingastofnun hyggst birta. Fyrirhugað er að uppfæra listann reglulega á heimasíðu TR. Fram kemur nafn tannlæknis og hvað Tryggingastofnun hefur greitt honum að meðaltali á barn á ákv. tímabili. Einnig sést fjöldi viðgerða hvers tannlæknis [vegna hvers barns], að meðaltali. Einnig er fyrirhugað að birta meðalverð tannlækna, eins og það birtist í reikningum sem Tryggingastofnun greiðir, á ákveðnum gjaldliðum. Í því tilviki verða nöfn tannlækna ekki birt en sjúklingar geta borið saman verð síns tannlæknis og meðalverð allra tannlækna. Loks hyggst Tryggingastofnun birta lista með nöfnum allra tannlækna, sem stofnunin hefur greitt reikninga frá, þar sem fram komi hversu langt yfir eða undir gjaldskrá ráðherra heildarupphæð reikninga viðkomandi tannlæknis hafa verið undanfarna 6-12 mánuði.

Eins og áður segir hyggst Tryggingastofnun birta umræddar upplýsingar á heimasíðu stofnunarinnar um miðjan október nk. komi ekki fram athugasemdir um annað frá móttakendum þessa bréfs fyrir þann tíma."

„#1 og 2

Í fyrsta lagi eru upplýsingar um hversu mikið það hefur kostað Tryggingastofnun að meðaltali fyrir hvert barn, á tilteknu ári, að einstakir tannlæknar sinni tannmeðferð barna. Listann má birta hvort heldur sem er, raðað í stafrófsröð eða verðröð. Mismunur á kostnaði TR samkvæmt þessum listum liggur ekki í mismunandi verði einstakra tannlækna heldur í mismunandi fjölda verka sem þeir veita börnum.

#3

Í öðru lagi er stuttur listi yfir helstu verkþætti sem stofnunin hefur greitt fyrir á tilteknu tímabili. Gefið verður upp meðalverð hvers verks fyrir sig eins og það er hjá öllum tannlæknum í heild. Almenningur getur þannig borið verð hjá sínum tannlækni við meðalverðið í landinu. Í stað bókstafa í fylgiskjali 3 kemur meðalverðið (sem nú er verið að reikna út).

#4

Loks er listi sem sýnir hversu mikið allir reikningar sem TR hefur greitt á tilteknu tímabili, frá hverjum tannlækni, víkja frá verði samkvæmt gjaldskrá nr. 898/2002 sem TR greiðir eftir. Þar getur almenningur séð hvernig verðlagningu einstakra tannlækna er almennt háttað. Í stað Sérfræðingar 1,2,3? og Almennir 1,2,3 o.s.frv., koma nöfn tannlæknanna."

„17. gr. Fyrirtæki, sem selur vörur eða þjónustu til neytenda, skal merkja vöru sína og þjónustu með verði eða sýna það á svo áberandi hátt á sölustaðnum að auðvelt sé fyrir neytendur að sjá það. Neytendastofa getur sett nánari ákvæði um verðmerkingar með opinberri tilkynningu.

18. gr. Neytendastofa getur gefið fyrirtækjum sérstök fyrirmæli um að gera ráðstafanir til að auðvelda viðskiptavinum að meta verð og gæði. Fyrirmælin geta falist í skyldu til að tilgreina verð, viðskiptakjör, gæði og aðra eiginleika og hvernig vara skal mæld, vegin og flokkuð. Neytendastofa getur gefið slík fyrirmæli með opinberri tilkynningu.

19. gr. Í því skyni að upplýsa neytendur og efla verðskyn þeirra aflar Neytendastofa upplýsinga um verð, verðmyndun og önnur viðskiptakjör og birtir niðurstöður eftir því sem ástæða þykir til. Neytendastofa skal setja verklagsreglur um öflun slíkra upplýsinga, meðferð þeirra og birtingu."