Öryggisbrestur hjá LinkedIn
Fréttatilkynning frá ítölsku persónuverndarstofnuninni
Persónuverndarstofnunin á Ítalíu hefur hafið rannsókn á öryggisbresti hjá LinkedIn sem leiddi til þess að óviðkomandi fengu aðgang að persónuupplýsingum um notendur samfélagsmiðilsins. Notendur LinkedIn eru hvattir til að vera á varðbergi, meðal annars vegna hættu á auðkennisþjófnaði.
Persónuverndarstofnunin á Ítalíu hefur hafið rannsókn á öryggisbresti hjá LinkedIn sem leiddi til þess að óviðkomandi fengu aðgang að persónuupplýsingum um notendur samfélagsmiðilsins, þ. á m. nöfnum, netföngum, símanúmerum, tenglum á aðra prófíla á LinkedIn og öðrum samfélagsmiðlum, sem og atvinnutengdum upplýsingum sem notendur höfðu birt.
Samhliða þessu hefur ítalska persónuverndarstofnunin áréttað að þeim, sem kunna að búa yfir persónuupplýsingum sem hafa orðið aðgengilegar vegna öryggisbrests, er óheimilt að nýta og vinna með slíkar upplýsingar. Í ljósi þess vill Persónuvernd vekja athygli á því að notkun persónuupplýsinga sem aflað hefur verið með ólögmætum hætti, svo sem upplýsinga sem birtar hafa verið á Netinu í kjölfar öryggisbrests, er óheimil og getur varðað sektum samkvæmt persónuverndarlögum.
Persónuvernd hvetur notendur LinkedIn, sem bresturinn tekur til, til þess að vera á varðbergi gagnvart óvenjulegum skilaboðum og öðrum atvikum sem geta tengst lekanum, svo sem varðandi notkun á símanúmerum og samfélagsmiðlaprófílum þeirra. Talið er að þeir einstaklingar sem urðu fyrir brestinum eigi á hættu á að upplýsingarnar verði notaðar í auðkennisþjófnaði.