Úrskurður Persónuverndar felldur úr gildi
Í gær var kveðinn upp dómur Hæstaréttar í máli sem læknir höfðaði á hendur Persónuvernd til ógildingar úrskurði stofnunarinnar frá 27. febrúar 2006.
Í gær var kveðinn upp dómur Hæstaréttar í máli sem læknir höfðaði á hendur Persónuvernd til ógildingar úrskurði stofnunarinnar frá 27. febrúar 2006 í máli nr. 2005/479.
Málið fjallaði um lögmæti þess þegar læknir skoðaði sjúkraskrá einstaklings í tengslum við álitsgerð sem hann vann fyrir tryggingafélag.
Persónuvernd taldi umboð sem einstaklingurinn hafði veitt lögmanni sínum ekki hafa verið nægilega ótvírætt til að fullnægja kröfum laga um upplýst samþykki skv. 7. ölul. 2. gr. laga nr. 77/2000.
Hæstiréttur túlkar lögmannsumboðið hins vegar með rýmri hætti en Persónuvernd. Lítur rétturinn einkum til þess sem einstaklingnum mátti vera fyrirsjáanlegt þegar hann veitti umboðið, þ.e. að það hefði verið gert til að sérfræðingi yrði fært að afla læknisfræðilegra gagna. Þá lítur rétturinn til þess að læknirinn hafði auk lögmannsumboðsins fengið í hendur áritun lögmannsinns á álitsbeiðni tryggingafélagsins. Loks leggur rétturinn sérstaka áherslu á að þremur dögum eftir að álitsbeiðnin var sett fram áréttaði lögmaðurinn við lækninn að "allar myndir gætu verið fyrir norðan hjá [X] lækni á FSA." Þessi ábending lögmannsins var talin hafa gefið lækninum enn ríkari ástæðu til að treysta því, í ljósi umboðsins sem hann hafði undir höndum og álitsbeiðnarinnar, að hann hefði fulla heimild til að afla þeirra ganga sem hann taldi nauðsynleg að byggja álit sitt á meðal annars með því að kanna sjúkráskrá í öryggisskyni þótt ekki lægi fyrir milliliðalaust og upplýst samþykki frá einstaklingnum í skilningi 7. tölul. 2. gr. laga nr. 77/2000.
Í ljósi þessara málsatvika féllst Hæstiréttur á kröfu læknisins og felldi úrskurðinn úr gildi.