Fréttir
Kynningarátak Persónuverndar vegna nýrrar persónuverndarlöggjafar
Persónuvernd hlaut nýverið styrk frá Evrópusambandinu (The European Union's Rights, Equality and Citizenship Programme (2014-2020)) til þess að ráðast í sérstakar aðgerðir til kynningar á nýrri persónuverndarlöggjöf, sem tók gildi hérlendis 15. júlí síðastliðinn. Löggjöfin er byggð á reglugerð Evrópusambandsins um sama efni. Hér að neðan má sjá lýsingu á þeim kynningaraðgerðum sem átakið tekur til.
Persónuvernd mun á næstu vikum halda í kynningarherferð um landið þar sem áhugasömum verður boðið að sækja málþing um nýju persónuverndarlöggjöfina. Upplýsingar um staðsetningu og tíma viðburðanna ásamt skráningarformi má nálgast hér að vefsíðunni. Í tengslum við kynningarherferðina hefur Persónuvernd útbúið fimm bæklinga um nýju löggjöfina. Í þeim eru teknar saman upplýsingar sem eiga bæði erindi við lítil og meðalstór fyrirtæki sem og almenning - þar á meðal börn og unglinga. Bæklingarnir eru einnig aðgengilegir hér á vefsíðunni.
Þá hefur Persónuvernd tekið saman fræðsluefni fyrir persónuverndarfulltrúa. Í nýjum persónuverndarlögum er sú skylda lögð á stjórnvöld og sum fyrirtæki að ráða persónuverndarfulltrúa, en verkefni þeirra eru einkum að tryggja að fyrirtækið eða stjórnvaldið uppfylli kröfur persónuverndarlaganna. Um er að ræða nýja starfsstétt hérlendis.
Að lokum hefur Persónuvernd sett á fót sérstakt þjónustuborð fyrir fyrirtæki vegna innleiðingar nýrrar persónuverndarlöggjafar. Þjónustuborðið tók til starfa síðastliðið sumar og verður starfrækt í eitt ár. Er það ætlað litlum og meðalstórum fyrirtækjum sem óska leiðbeininga í tengslum við innleiðingu nýju laganna. Þær spurningar sem berast þjónustuborðinu eru jafnframt hafðar til hliðsjónar við ritun fræðsluefnis fyrir fyrirtæki, sem birt er á vefsíðu stofnunarinnar.