Leyfisskyld vinnsla persónuupplýsinga

Rannsóknir

Að meginstefnu til er vinnsla persónuupplýsinga í þágu rannsókna ekki háð leyfi Persónuverndar, heldur nægir að vinnslan sé tilkynnt til Persónuverndar og uppfylli skilyrði 8., og eftir atvikum 9. gr. laga um persónuvernd. Frá þessu eru þó vissar undantekningar.

Alltaf þarf að sækja um leyfi fyrir

• Aðgangi að sjúkraskrám í þágu vísindarannsóknar
• Aðgangi að lífsýnasafni í þágu vísindarannsóknar

• Vinnslu persónuupplýsinga sem tengist framkvæmd vísindarannsóknar þar sem unnið er með erfðaefni manns

Að öðru leyti byggir vinnsla persónuupplýsinga í þágu rannsókna á upplýstu samþykki hinna skráðu einstaklinga. Ef ekki liggur fyrir upplýst samþykki eða lagaheimild þarf að sækja um leyfi fyrir

• Samkeyrslu (1) skráar sem hefur að geyma viðkvæmar persónuupplýsingar við (2) aðra skrá, hvort sem sú skrá hefur að geyma almennar eða viðkvæmar persónuupplýsingar nema (3) samkeyrslan byggi á fyrirmælum laga eða (4) ef samkeyrðar eru skrár sama ábyrgðaraðila, eða (5) ef einvörðungu eru samkeyrðar upplýsingar um nafn, kennitölu, fyrirtækjanúmer, heimilisfang, aðsetur og póstnúmer.
• Vinnslu persónuupplýsinga um refsiverðan verknað manns og sakaferil, upplýsingar um lyfja-, áfengis- og vímuefnanotkun, kynlíf og kynhegðan nema vinnslan sé nauðsynlegur og eðlilegur þáttur í starfsemi viðkomandi aðila. Það athugast að vinnsla slíkra upplýsinga telst aðeins í þröngum undantekningartilvikum vera nauðsynlegur og eðlilegur þáttur í starfsemi einkaaðila.
• Vinnslu persónuupplýsinga um félagsleg vandamál manna eða önnur einkalífsatriði, s.s. hjónaskilnaði, samvistarslit, ættleiðingar og fóstursamninganema vinnslan sé nauðsynlegur og eðlilegur þáttur í starfsemi viðkomandi aðila.
• Söfnun persónuupplýsinga um fjárhagsmálefni og lánstraust einstaklinga í þeim tilgangi að miðla þeim til annarra.
• Vinnsla persónuupplýsinga sem felur í sér að nafn manns er fært á skrá eftir fyrirfram ákveðnum viðmiðum og upplýsingunum miðlað til þriðja aðila í því skyni að neita manninum um tiltekna fyrirgreiðslu eða þjónustu.
• Miðlun viðkvæmra persónuupplýsinga í þágu vísindarannsóknar, enda standi ábyrgðaraðili þeirra upplýsinga sem miðlað er ekki að framkvæmd rannsóknarinnar.

Flutningur persónuupplýsinga úr landi

Flutningur persónuupplýsinga til tiltekinna landa kann að vera háður leyfi Persónuverndar. Hafðu samband við Persónuvernd til að fá nánari upplýsingar.

Almannahagsmunir

Að meginreglu verður sérhver vinnsla viðkvæmra persónuupplýsinga að eiga sér stoð í 1. mgr. 8. gr. og 1. mg. 9. gr. laga nr. 77/2000 um persónuvernd. Persónuvernd getur þó heimilað vinnslu viðkvæmra persónuupplýsinga í öðrum tilvikum  telji hún brýna almannahagsmuni mæla með því. Persónuvernd bindur slíka heimild þeim skilyrðum sem hún telur nauðsynleg hverju sinni til að tryggja hagsmuni hinna skráðu.