Almennt leyfi til vinnslu persónuupplýsinga

Athugið að ekki skal fylla út almenna leyfisumsókn þegar sótt er um leyfi til aðgangs að sjúkraskrám.

Persónuvernd tekur einnig fram að afgreiðsla umsókna tekur að minnsta kosti 4 vikur frá því að umsókn telst vera tilbúin, þ.e. þegar öll fylgigögn hafa borist. Er rannsakendum því bent á að skila inn umsókn sinni tímanlega.

Þegar ekki liggur fyrir upplýst samþykki eða lagaheimild þarf að sækja um leyfi fyrir:

• Samkeyrslu (1) skráar sem hefur að geyma viðkvæmar persónuupplýsingar við (2) aðra skrá, hvort sem sú skrá hefur að geyma almennar eða viðkvæmar persónuupplýsingar nema (3) samkeyrslan byggi á fyrirmælum laga eða (4) ef samkeyrðar eru skrár sama ábyrgðaraðila, eða (5) ef einvörðungu eru samkeyrðar upplýsingar um nafn, kennitölu, fyrirtækjanúmer, heimilisfang, aðsetur og póstnúmer.
• Vinnslu persónuupplýsinga um refsiverðan verknað manns og sakaferil, upplýsingar um lyfja-, áfengis- og vímuefnanotkun, kynlíf og kynhegðan nema vinnslan sé nauðsynlegur og eðlilegur þáttur í starfsemi viðkomandi aðila. Það athugast að vinnsla slíkra upplýsinga telst aðeins í þröngum undantekningartilvikum vera nauðsynlegur og eðlilegur þáttur í starfsemi einkaaðila.
• Vinnslu persónuupplýsinga um félagsleg vandamál manna eða önnur einkalífsatriði, s.s. hjónaskilnaði, samvistarslit, ættleiðingar og fóstursamninganema vinnslan sé nauðsynlegur og eðlilegur þáttur í starfsemi viðkomandi aðila.
• Söfnun persónuupplýsinga um fjárhagsmálefni og lánstraust einstaklinga í þeim tilgangi að miðla þeim til annarra.
• Vinnsla persónuupplýsinga sem felur í sér að nafn manns er fært á skrá eftir fyrirfram ákveðnum viðmiðum og upplýsingunum miðlað til þriðja aðila í því skyni að neita manninum um tiltekna fyrirgreiðslu eða þjónustu.
• Miðlun viðkvæmra persónuupplýsinga í þágu vísindarannsóknar, enda standi ábyrgðaraðili þeirra upplýsinga sem miðlað er ekki að framkvæmd rannsóknarinnar.
  

Almenna leyfisumsókn til vinnslu persónupplýsinga má finna hér.