Myndavélar í ræktinni

Má taka myndir af mér í ræktinni án viðvarana?

Eftirlit með myndavélum telst vera rafræn vöktun í skilningi 6. tölul. 2. gr. laga nr. 77/2000. Ef slíkt eftirlit hefur jafnframt í för með sér söfnun myndefnis og hægt er að bera kennsl á einstaklinga á myndefninu felur vöktunin í sér vinnslu persónupplýsinga, sbr. 1. og 2. tölul. 2. gr. laga nr. 77/2000.

Vinnsla persónuupplýsinga er óheimil nema uppfyllt séu skilyrði 1. mgr. 8. gr., og eftir atvikum skilyrði 1. mgr. 9. gr. laga nr. 77/2000.

Í 1. mgr. 4. gr. laga nr. 77/2000, um persónuvernd og meðferð persónuupplýsinga, kemur fram að rafræn vöktun er ávallt háð því skilyrði að hún fari fram í málefnalegum tilgangi. Jafnframt segir þar að rafræn vöktun svæðis þar sem takmarkaður hópur fólks fer um að jafnaði er háð því skilyrði að hennar sér sérstök þörf vegna eðlis þeirrar starfsemi sem þar fer fram.

Samkvæmt 4. gr. reglna nr. 837/2006, um rafræna vöktun, verður rafræn vöktun að fara fram í yfirlýstum, skýrum og málefnalegum tilgangi, s.s. í þágu öryggis eða eignavörslu.Við alla rafræna vöktun skal þess gætt að ganga ekki lengra en brýna nauðsyn ber til miðað við þann tilgang sem að er stefnt sbr. 5. gr. vöktunarreglnanna.

Samkvæmt 3. gr. reglna nr. 837/2006, um rafræna vöktun, er vöktun með leynd óheimil nema hún styðjist við lagaheimild eða úrskurð dómara. Skal vöktun fara fram í skýrum, yfirlýstum og málefnalegum tilgangi, s.s. í þágu öryggis og eignavörslu, sbr. 4. gr. sömu reglna, og gæta verður að ganga ekki lengra en brýna nauðsyn ber til miðað við þann tilgang sem að er stefnt, sbr. 5. gr. reglnanna.

Í 24. gr. laga nr. 77/2000, um persónuvernd og meðferð persónuupplýsinga, er kveðið á um að þegar rafræn vöktun fer fram á vinnustað eða almannafæri skuli með merki eða á annan áberandi hátt gera glögglega viðvart um þá vöktun og hver sé ábyrgðaraðili. Það er því skylt, sé um rafræna vöktun að ræða, að hafa merki eða aðrar viðvaranir.