Bréf

Þegar bréf eru send til mín í vinnuna er ritarinn yfirleitt búinn að opna þau áður en ég fæ þau sjálfur. Er þetta löglegt?

Opnun sendibréfa fellur ekki undir gildissvið laga um persónuvernd, en í lögum nr. 19/2002 póstþjónustu er að finna ákvæði um móttöku og afhendingu póstsendinga. Í 1. málsl. 4. mgr. 31. gr. þeirra laga segir: „Póstsendingu skal dreift til eða afhent þeim aðila sem hún er stíluð á eða hefur umboð til viðtöku hennar, í bréfakassa eða pósthólf viðtakanda eða þangað sem utanáskrift segir að öðru leyti til um."

Í 1. málsl. 1. mgr. 228. gr. almennra hegningarlaga nr. 19/1940 segir: „Ef maður hnýsist í bréf, skjöl, dagbækur eða önnur slík gögn sem hafa að geyma upplýsingar um einkamál annars manns, og hann hefur komist yfir gögnin með brögðum, opnað bréf, farið í læsta hirslu eða beitt annarri áþekkri aðferð, þá varðar það sektum eða fangelsi allt að 1 ári."

Það fellur ekki undir valdsvið Persónuverndar að skera úr um hvort háttsemi sé í samræmi við framangreind lagaákvæði, en í ljósi þeirrar venju að móttökuritarar eða aðrir skrifstofustarfsmenn opni og bóki bréf sem berast til fyrirtækja og stofnana má búast við því að bréf verði að vera mjög skýrlega merkt sem einkamál til þess að slíkum starfsmönnum sé óheimilt að opna það. Að öðrum kosti er litið á fyrirtækið eða stofnunina sem viðtakanda sendingarinnar, þrátt fyrir að óskað sé eftir því að bréfið sé borið til tiltekins starfsmanns. Af þessu leiðir að almennt er óæskilegt að senda einkabréf á vinnustað fólks. Þó er rétt að taka fram að að sjálfsögðu er ekkert sem stendur því í vegi að öðru fyrirkomulagi sé komið á á hverjum og einum vinnustað.