Eftirlitsmyndavélakerfi

Ég hef sett upp eftirlitsmyndavélakerfi í verslun sem ég rek. Þarf ég að gera viðskiptavinum viðvart um þessa vöktun? Hvað má ég gera við myndir úr slíku myndavélakerfi, t.d. myndir af þeim sem hnupla

Samkvæmt 24. gr. laga nr. 77/2000 , þarf að gera viðvart um vöktunina með merki eða á annan áberandi hátt. Gagnvart starfsmönnum þarf einnig að sinna fræðsluskyldu, m.a. um það hvaða búnaður er notaður við vöktunina, tilgang hennar, hversu lengi myndir verða varðveittar, hver hefur aðgang að þeim og um önnur atriði sem þeim eru nauðsynleg til að gæta réttar síns.

Um myndefni sem verður til við rafræna vöktun er fjallað í 2. mgr. 9. gr. laga nr. 77/2000 og í 7. gr. reglna nr. 837/2006. Í reglunum segir m.a. að persónuupplýsingar sem til verða við framkvæmd rafrænnar vöktunar megi aðeins nota í þágu tilgangs með söfnun þeirra og aðeins að því marki sem þess gerist þörf í þágu tilgangsins. Þær megi ekki afhenda öðrum, vinna frekar eða geyma nema með samþykki hins skráða eða samkvæmt ákvörðun Persónuverndar. Þó er heimilt að afhenda lögreglu efni með upplýsingum um slys eða meintan refsiverðan verknað en þá skal þess gætt að eyða öllum öðrum eintökum af efninu.

Verslunareigendum, og öðrum sem hafa sett upp eftirlitsmyndavélakerfi, er þannig óheimilt að hengja upp, setja á netið eða dreifa á annan hátt myndum af einstaklingi sem þeir gruna um þjófnað, án leyfis viðkomandi einstaklings eða Persónuverndar. Enda er að íslenskum rétti það talið verkefni lögreglu að rannsaka brotamál, en ekki hins almenna borgara. 

Um meðferð lögreglu á myndefninu fer hins vegar samkvæmt lögum nr. 19/1991, um meðferð opinberra mála.

• Hér er að finna ítarlegri umfjöllun um rafræna vöktun, m.a. reglur, leiðbeiningar, úrskurði og fleira.