Persónuvernd. Þínar upplýsingar, þitt einkalíf. - Efst á baugi - Úrskurðir o.fl.

Umsögn um frumvarp til breytinga á lögum um gjaldeyrismál

Wed, 16 May 2012 14:44:00 +0000

Persónuvernd hefur veitt umsögn um frumvarp til laga um breytingu á lögum gjaldeyrismál. Það gerir m.a. ráð fyrir auknu persónueftirliti Seðlabanka Íslands (SÍ). Persónuvernd leggur til að ákvæði um aukið eftirlit verði fellt brott. Hún telur að áður en slík lög yrðu sett þyrfti að ígrunda hvert skuli stefna í þessum efnum og meta hvaða persónuupplýsingum fjármálastofnunum sé í raun nauðsynlegt að skrá og láta SÍ í té.

Birting kennitalna í dómasafni á vefsíðu

Fri, 11 May 2012 11:12:00 +0000

Persónuvernd fjallaði um birtingu kennitalna í rafrænu dómasafni á vefsíðu. Var niðurstaðan sú að umrædd birting kennitalna á vefsíðunni ætti sér ekki lagaheimild. Þá var ekki fallist á ósk um að Persónuvernd veitti heimild til hennar. Hins vegar var tilmælum beint til ábyrgðaraðila um að beita tæknilegum ráðstöfunum og koma í veg fyrir að í dómasafninu yrði unnt að leita uppi og samtengja upplýsingar um einstaka menn á grundvelli kennitalna þeirra.

Upplýsingar til Bandaríkjanna um dæmda hryðjuverkamenn

Fri, 11 May 2012 11:11:00 +0000

Persónuvernd hefur svarað innanríkisráðuneytinu um lögmæti þess að flytja héðan persónuupplýsingar til Bandaríkjanna. Þetta yrði gert í þágu samninga um vegabréfsáritanafrelsi. Persónuvernd gerði ekki athugasemdir enda yrðu aðeins fluttar héðan upplýsingar um einstaklinga sem hefðu verið dæmdir fyrir hryðjuverkabrot. Afstaðan byggðist á þeim forsendum að flutningur upplýsinganna þætti vera nauðsynlegur vegna almannahagsmuna og að við flutninginn yrði þess gætt að hann myndi uppfylla skilyrði þjóðréttarskuldbindingar Íslands, sbr. Rammaákvörðun nr. 2008/977/JHA.

Umbeðin leiðrétting gerð á niðjatalsupplýsingum

Fri, 11 May 2012 11:09:00 +0000

K hafði kvartað yfir því að á tiltekinni vefsíðu væri þess ekki getið að M væri hennar fyrrverandi eiginmaður. Hér reyndi á reglur um leiðréttingarskyldu ábyrgðaraðila. Hann féllst á að gera breytinguna og var málið þá fellt niður.

Leyfi og tilkynningar í apríl 2012

Wed, 9 May 2012 10:49:00 +0000

Í apríl 2012 voru samtals veitt 9 leyfi í tengslum við rannsóknir og verkefni. Einnig bárust stofnuninni 36 tilkynningar um vinnslu persónuupplýsinga.

Aukið álag hjá Persónuvernd

Thu, 3 May 2012 11:46:00 +0000

Stöðug aukning hefur orðið í fjölda innkominna erinda hjá Persónuvernd, en það sem af er þessu ári hafa 612 ný mál verið skráð hjá stofnuninni. Til samanburðar voru nýskráð mál þann 1. maí 2008 alls 361. Er því um 75% aukningu að ræða á fjórum árum. Á sama tíma hefur starfsmönnum stofnunarinnar fækkað. Haldi áfram sem horfir má búast við því að umtalsverðar tafir, umfram það sem nú er, verði á afgreiðslu mála hjá stofnuninni seinni part árs auk þess sem stofnunin sér ekki fram á að geta sinnt lögbundnum verkefnum sínum með fullnægjandi hætti.

Kvörtun yfir ómerktum markpósti

Wed, 25 Apr 2012 14:41:00 +0000

Persónuvernd hefur úrskurðað um kvörtun yfir markpósti um barnamat. Kvartanda var sendur pósturinn vegna þess að hann átti sex mánaða gamalt barn. Persónuvernd taldi að viðkomandi fyrirtæki, sem var sérfræðifyrirtæki á sviði beinnar markaðssóknar, hafi ekki virt reglur um áritun á markpóst.

Varðveisla fjármálafyrirtækis á upplýsingum um viðskiptavin

Wed, 25 Apr 2012 14:33:00 +0000

Persónuvernd hefur úrskurðað í máli manns sem kvartaði yfir því að fjármálafyrirtæki hefði varðveitt upplýsingar um sig of lengi. Upplýsingarnar tengdust lánasamningi frá árinu 1995. Persónuvernd taldi fyrirtækinu hafa, í umrætt sinn, verið heimilt að varðveita upplýsingarnar.

Heimild lýtalæknis til að upplýsa um konur með PIP-brjóstafyllingar

Wed, 18 Apr 2012 13:11:00 +0000

Persónuvernd hefur veitt Læknafélagi Íslands leiðbeinandi svar um heimildir tiltekins læknis til að segja landlækni hvaða konur hafa s.k. PIP-brjóstafyllingar. Tilefnið er ósk landlæknis um að fá slíkar persónuupplýsingar. Í svari sínu bendir Persónuvernd m.a. á að rík þagnarskylda hvíli á læknum. Skyldan sé bundin í lög og henni verði ekki létt af þeim nema með lögum. Við slíkt yrði að gæta þeirra grundvallarréttinda sem allir njóta skv. 71. gr. stjórnarskrárinnar. Þau réttindi má ekki skerða slík nema brýna nauðsyn beri til vegna réttinda annarra. Þá er bent á að það er Lyfjastofnun sem hefur eftirlit með gæðum brjóstafyllinga, en ekki landlæknir.

Birting viðkvæmra gagna frá lögreglu á vefsíðu

Tue, 3 Apr 2012 11:57:00 +0000

Persónuvernd barst athugasemd vegna viðtals við lögreglumann þar sem hann greindi frá viðkvæmum persónuupplýsingum, sem hann fékk aðgang að í starfi sínu. Persónuvernd gerði athugasemdir við lögreglu og beindi til hennar tilmælum um bætta meðferð trúnaðarupplýsinga.

Samkeyrsla þinglýsingarskráar og þjóðskrár

Tue, 3 Apr 2012 11:55:00 +0000

Persónuvernd hefur svarað fyrirspurn fjölmiðils varðandi samkeyrslu þinglýsingaskrár og þjóðskrár með það fyrir augum að fá upplýsingar um jarðir í eigu útlendinga hér á landi. Í svari Persónuverndar kemur fram að samkeyrsla á vegum Þjóðskrár Íslands (sem er stjórnvald) verði að eiga sér stoð í lögum en að vinnsla fjölmiðils í þágu fréttamennsku þurfi þess ekki.

Leyfi og tilkynningar í mars 2012

Tue, 3 Apr 2012 10:41:00 +0000

Í mars 2012 voru samtals veitt 15 leyfi í tengslum við rannsóknir og verkefni. Einnig bárust stofnuninni 75 tilkynningar um vinnslu persónuupplýsinga.

Heimild lýtalækna til miðla upplýsingum um allar konur sem fengið hafa brjóstafyllingar, óháð tegund fyllinga

Fri, 30 Mar 2012 16:31:00 +0000

Persónuvernd hefur veitt Læknafélaginu Íslands (LÍ) leiðbeinandi svar um heimildir lækna til að gefa landlækni upplýsingar um allar konur sem fengið hafa brjóstafyllingar (óháð tegund fyllingar) hér á landi frá árinu 2000. Tilefnið er ósk landlæknis um að fá persónuupplýsingar um allar konurnar. Í svari sínu bendir Persónuvernd á að rík þagnarskylda hvíli á læknum samkvæmt lögum. Til að létta þeirri þagnarskyldu af þeim þurfi skýra heimild, t.d. samþykki viðkomandi sjúklings, eða lagaheimild. Í gildandi lögum sé ekki að finna slíka heimild. Þá er bent á að slíkt verði ekki heimilað með lögum nema að uppfylltum skilyrðum 71. gr. stjórnarskrárinnar. Einnig er tekið fram að svara megi mögulegum spurningum landlæknis með framkvæmd vísindarannsóknar.

Birting nafns á heimasíðu héraðsdómstóla

Thu, 29 Mar 2012 10:17:00 +0000

Vísað hefur verið frá kvörtun manns yfir því að nafn hans kemur fram í dómi sem birtur er á vefsíðu sem rekin er á ábyrgð dómstólaráðs og héraðsdómstólanna. Um er að ræða dóm í sakamáli. Í ákvörðun Persónuverndar segir að þótt í ýmsu tilliti megi líta á dómstólaráð sem stjórnvald, er fari með almenn stjórnsýsluverkefni, starfi það einnig í umboði dómaranna. Það var því niðurstaða Persónuverndar að það félli utan hennar valdheimilda að úrskurða um lögmæti ákvörðunar um netbirtingu dómsins.

Leyfi og tilkynningar í febrúar 2012

Thu, 15 Mar 2012 14:40:00 +0000

Í febrúar 2012 voru samtals veitt 28 leyfi í tengslum við rannsóknir og verkefni. Einnig bárust stofnuninni 70 tilkynningar um vinnslu persónuupplýsinga.

Skráning kennitölu við gjaldeyrisviðskipti

Tue, 13 Mar 2012 10:46:00 +0000

Seðlabankinn óskaði þess að Persónuvernd endurskoðaði afstöðu sína varðandi skráningu kennitalna einstaklinga við gjaldeyrisviðskipti undir 1000 evrum. Persónuverndi veitti almennt svar. Þar er bent á að ríkur vafi leiki á um hvort lagaheimild standi til þeirrar víðtæku kennitöluskráningar sem Seðlabankinn telur þurfa að fara fram í viðskiptabönkunum, þ.e. í þágu eftirlits með gjaldeyrishöftum.

Upplýsingar um einstaklinga sem taldir eru tengjast hryðjuverkum

Tue, 13 Mar 2012 10:45:00 +0000

Persónuvernd hefur, að beiðni innanríkisráðherra, veitt álit á að Ísland og Bandaríkin skiptist á persónuupplýsingum um einstaklinga sem taldir séu geta tengst hryðjuverkum. Í álitinu er bent á að fyrst yrði að tryggja að heimild stæði til þess að skrá slíkar persónuupplýsingar og til annarrar vinnslu á þeim. Að því er varði flutning þeirra til Bandríkjanna yrði einnig að uppfylla sérstök skilyrði. Tryggja yrði öryggi þeirra hjá viðtakanda og virða tilgreindar þjóðréttarlegar skuldbindingar sem Ísland hefur þegar gengist undir. Flutningur upplýsinganna gæti stuðst við lagaheimild.

Reglur um skiptingu starfa á milli stjórnar og starfsmanna Persónuverndar.

Tue, 13 Mar 2012 10:43:00 +0000

Stjórn Persónuverndar hefur sett reglur um skiptingu starfa milli sín og forstjóra. Þær hafa verið birtar í B-deild Stjórnartíðinda og eru nr. 231/2012. Þær eru settar á grundvelli 8. mgr. 36. gr. laga nr. 77/2000.

Umsögn um drög að frumvarpi til laga um um vísindarannsóknir á heilbrigðissviði og frumvarpi til laga um breytingu á lögum um lífsýnasöfn

Thu, 8 Mar 2012 15:46:00 +0000

Persónuvernd hefur veitt umsögn um drög að frumvarpi til laga um vísindarannsóknir á heilbrigðissviði og drög að frumvarpi um breytingu á lögum um lífsýnasöfn. Í frumvörpunum eru lagðar til víðtækar breytingar á stjórnsýslu vegna aðgangs að heilbrigðisgögnum, ásamt ákvæðum um leitargrunna o.fl. Í umsögn Persónuvernd er m.a. að finna tillögu sem komið geti í stað þess leyfisveitingakerfis sem verið hefur við lýði frá árinu 1997.

Skráning í rekstrarsöguskrá

Thu, 8 Mar 2012 15:43:00 +0000

Persónuvernd hefur úrskurðað í máli manns varðandi skráningu persónuupplýsinga hjá Creditinfo-Lánstrausti. Um var að ræða upplýsingar um stjórnarsetu hans í félögum sem orðið höfðu gjaldþrota. Persónuvernd taldi að skráningin hefði verið heimil samkvæmt b-lið 7. tölul. 2. gr. starfsleyfis Creditinfo-Lánstrausts til skráningar upplýsinga um einstaklinga.

Umsögn um frumvarp til laga um þjóðskrá og almannaskráningu

Thu, 8 Mar 2012 15:23:00 +0000

Persónuvernd hefur veitt umsögn um frumvarp til laga um breytingu á lögum um þjóðskrá og almannaskráningu. Þar var gert ráð fyrir víðtækum heimildum Þjóðskrár Íslands til að afhenda persónuupplýsingar gegn gjaldi. Persónuvernd taldi að orðalag ákvæðisins væri of víðtækt. Var lagt til að ákvæðinu yrði breytt þannig að skýrt væri hverjir slíkir aðilar væru og hvaða persónuupplýsingum megi miðla.

Miðlun í þágu markaðssetningar

Wed, 29 Feb 2012 10:46:00 +0000

Persónuvernd hefur úrskurðað í máli konu sem kvartaði yfir því að Gagnaveita Reykjavíkur hefði miðlað persónuupplýsingum um sig til annarra fyrirtækja. Þetta var ekki samræmi við sérreglur um miðlun persónuupplýsinga í þágu markaðssetningar. Miðlunin var því ekki talin hafa verið heimil.

Miðlun upplýsinga um upphaf og lok afplánunar kynferðisafbrotamanna

Mon, 27 Feb 2012 11:30:00 +0000

Persónuvernd barst fyrirspurn Fangelsismálastofnunar um heimild sína til að að miðla upplýsingum um upphaf og lok afplánunar til Barnaverndarstofu. Veitt var almennt leiðbeinandi svar. Varðandi upplýsingar um lok afplánunarbenti Persónuvernd á 36. gr. barnaverndarlaga. Að því er varðaði miðlun upplýsinga um upphaf afplánunar vísaði Persónuvernd hins vegar til 4. tölul. 1. mgr. 9. gr. persónuverndarlaga, og taldi að miðlunin gæti verið nauðsynleg til að verja verulega hagsmuni þeirra barna sem Barnaverndarstofu er ætlað að standa vörð um. Barnaverndarstofa yrði hverju sinni að meta hvort uppfyllt væru lagaskilyrði til þess.

Öflun sakavottorðs starfsmanna barnaverndaryfirvalda, heimila og stofnana.

Mon, 27 Feb 2012 11:29:00 +0000

Persónuvernd barst fyrirspurn Huggarðs um heimildir Barnaverndarstofu til að fá sakavottorð starfsmanna barnaverndaryfirvalda, heimila og stofnana. Veitt var almennt leiðbeinandi svar. Varðandi öflun sakavottorðs við ráðningu nýrra starfsmanna benti Persónuvernd á 36. gr. barnaverndarlaga. Slíkri heimild væri ekki til að dreifa varðandi öflun sakavottorða frá þeim sem þegar væru við störf og því yrði Barnaverndarstofa yrði að meta atvik hverju sinni og álykta hvort öflun vottorðs væri nauðsynleg til að standa vörð um hagsmuni barna, að lagaskilyrðum uppfylltum.

Umsögn um þingsályktunartillögu um forvirkar rannsóknarheimildir

Tue, 14 Feb 2012 11:35:00 +0000

Persónuvernd hefur veitt umsögn um þingsályktunartillögu um forvirkar rannsóknarheimildir. Þar er m.a. gert ráð fyrir að innanríkisráðherra verði falið að vinna frumvarp um að lögregla fái heimild til að rannsaka og grípa til fyrirbyggjandi aðgerða gegn skipulagðri glæpastarfsemi. Persónuvernd telur að þær megi einungis beinast að alvarlegustu brotum, sem skýrlega yrðu skilgreind í lögum.

Annmarkar á öryggi við innskráningu á heimasíðu

Tue, 14 Feb 2012 11:32:00 +0000

Persónuvernd hefur lagt fyrir Orlofssjóð Bandalags háskólamanna að gera breytingar á vefsíðu sinni og viðhafa tæknilegar öryggisráðstafanir til að vernda persónuupplýsingar félagsmanna gegn óleyfilegum aðgangi.

Opinber birting á fjárhagsupplýsingum

Tue, 14 Feb 2012 11:31:00 +0000

Persónuvernd hefur svarað fyrirspurn Íbúahreyfingarinnar í Mosfellsbæ um hvort birting á fjárhagsupplýsingum lögaðila falli undir gildissvið persónuverndarlaga. Í svari stofnunarinnar kemur m.a. fram að í ákveðnum tilvikum geti upplýsingar um lögaðila verið það nátengdar tilteknum einstaklingi að á þær skuli líta sem persónuupplýsingar.

Dagsektir vegna kennitöluskráningar

Thu, 9 Feb 2012 12:19:00 +0000

Persónuvernd hefur lagt fyrir Arion banka að breyta verklagi sínu við skráningu kennitalna við gjaldeyrisviðskipti. Það skuli gert fyrir 10. febrúar 2012. Að öðrum kosti komi dagsektir, til framkvæmda.

Synjað ósk um samkeyrslu við lyfjagagnagrunn

Thu, 9 Feb 2012 12:15:00 +0000

Persónuvernd hefur synjað umsókn um leyfi til að samkeyra persónuupplýsingar, sem til urðu við gerð rannsóknar, við lyfjagagnagrunn landlæknis. Ekki lá fyrir að heimilt hafi verið að varðveita upplýsingarnar og því var ekki talið unnt að heimila slíka notkun þeirra.

Rafræn vöktun hjá Tollstjóra

Thu, 9 Feb 2012 12:13:00 +0000

Persónuvernd hefur veitt umsögn um uppsetningu öryggismyndavéla utan á húsnæði Tollstjóra í Tryggvagötu. Var Tollstjóra leiðbeint um helstu reglur sem nauðsynlegt er að virða þegar notast er við eftirlitsmyndavélar á almannafæri. Var einkum hugað að vélum við innganga í Kolaportið.