Efst á baugi - Úrskurðir o.fl.
Alcan á Íslandi telst vera ábyrgðaraðili þeirra persónuupplýsinga sem söfnuðust við upplýsingaöflun félagsins í tengslum við kosningar um stækkun álversins í Straumsvík
Hinn 26. júní sl. kvað Persónuvernd upp úrskurð um hvort Alcan á Íslandi hf. teldist ábyrgðaraðili persónuupplýsinga sem söfnuðust við upplýsingaöflun félagsins í tengslum við kosningar um fyrirhugaða stækkun álversins í Straumsvík.
Forsaga málsins er sú að um miðjan marsmánuð bárust Persónuvernd símtöl vegna upplýsingaöflunarinnar. Símtal við framkvæmdastjóra hjá Alcan á Íslandi hf. þótti gefa tilefni til þess að taka málið til frekari athugunar.
Í framhaldinu áttu sér stað bréfaskipti þar sem fram komu athugasemdir, er taldar voru leiða til þess að áður en skorið yrði úr því hvort upplýsingaöflunin væri í samræmi við ákvæði laga um persónuvernd, yrði að skera úr um hvort Alcan á Íslandi hf. teldist ábyrgðaraðili upplýsinganna, í heild eða hluta. Það hefði aftur áhrif á hverjum stæði næst að veita Persónuvernd upplýsingar við rannsókn málsins.
Persónuvernd taldi ljóst af gögnum málsins að Alcan á Íslandi hf. fór með ákvörðunar- og ráðstöfunarvald þeirra persónuupplýsinga sem söfnuðust í upplýsingaöflun félagsins og komst því að þeirri niðurstöðu að Alcan á Íslandi hf. teldist vera ábyrgðaraðili þeirra í skilningi laga. Gildir það bæði um upplýsingarnar eins og þær birtust í notendaviðmóti sem starfsmenn Alcan á Íslandi hf. höfðu aðgang að og eins og þær voru skráðar hjá aðstandendum kerfisins „kosningavelin.net.“
Tekið skal fram að afstaða hefur ekki verið tekin til þess hvort upplýsingaöflunin var í samræmi við ákvæði laga um persónuvernd eða ekki.